KCK’ê gerîla pîroz kir

0
49

KCK’ê gerîla pîroz kir û got, “Em hevrêyên xwe hemûyan ji dil û can pîroz dikin ku tevlî vê pêvajoya serketî bûne.”

Hevserokatiya Konseya Rêveber a KCK’ê ji fermandar û şervanên HPG û YJA Starê re peyameke pîrozbahiyê şand. KCK’ê got, “Beriya her tiştî em şehîdên xwe yên leheng ên Pêngavên Şoreşgerî yên Bazên Zagrosê û Şehîd Savaş a Cenga Xabûrê bi rêzdarî bi bîr tînin. Em soz didin ku ala wan a berxwedanê bi ser bixînin û xwedî li bîranîna wan derkevin.”

Hevserokatiya Konseya Rêveber a KCK’ê di peyamê de wiha got:

“Hevrêyên hêja

Em gel û tevger di pêvajoyeke girîng û krîtîk de ne. Rejîma faşîst a AKP-MHP’ê ji 14’ê Nîsanê û vir ve bi piştgiriya ji hêzên hegemonîk û hevkarên xwe yên herêmî wergirtî, dest bi pêleke nû ya êrîşê kiriye. Bi vê pêla êrîşê re ku weke hewldaneke dawî jî dikare bê pênasekirin, dijminê mêtinger heta jê tê êrîş dike, dixwaze serketineke biçûk a li dijî gerîla ji xwe re bike çavkaniya jiyanê. Tevî ku zêdeyî du meh di ser re derbas bûne jî dijmin bi ti awayî negihîştiye armanca xwe, di serî de Zap, Avaşîn û Metînayê li berxwedana dîrokî ya Gerîlayên Azadiyê yên Kurdistanê rast hat. Lewma serketina berxwedana we hevrêyên hêja, ku di Pêngavên Şoreşgerî yên Bazên Zagrosê û Şehîd Savaş Maraş a Cenga Xabûrê de nîşan dan, hesabên dijmin hemû têk bir, dijmin anî ber hilweşînê. Di heman demê de dilê gelê me û dostên me xweş kir, bû moraleke mezin.

Hevrêyên hêja

Hûn, ku nûnerên nifşê fedaî ne ku bi felsefeya jiyan û têkoşînê ya Rêber Apo û bi ala berxwedana gerîla ya Pêngava 15’ê Tebaxê ya hevrê Egîd bûne mîna pola, di cihê diyarker ê şer de ne ku li ser gelê me tê ferzkirin. Beriya we fermandarên me yên fedaî Delal Amed, Reşît Serdar, Alî Piling, Rojîn Gewda, Savaş Maraş û gelek fermandarên ku em nikarin navê hemûyan bilêv bikin, heman al bi rûmetdarî bilind kirin. Hûn weke şopdarên van fermandarên me yên fedaî, di asta ‘lûtkeyê’ de li navenda vî şerî ne. Hûn zanin ku ya li vê xakê diparêzin, ne tenê herêmeke, hûn paşeroja azad a gelê me, tevahiya xaka welat diparêzin. Em ji xwe zanin ku haya we ji vê berpirsyariya wezîfeya girîng heye û bi cih tînin. Berxwedana ku par li Garê destpê kir û li Mamreşo, Girê Sor û Werxelê dijmin hejand, îsal jî li Werxelê, Kurojahro, Şikefta Birîndara, Şehîd Şahîn, Girê Cûdî, Girê FM û Girê Hakkarî rê nade dijmin û derbên herî giran ên dîrokê lê didin. Ev pêvajoya şer ku bi Mizgîn û Rohatan destpê kir, bi Mahîr, Siyabend û Ekînan geş bû û bi Nalîn û Ozguran gihîşt asta herî bilind, bi fermandarên me yên pêşeng ên Tunela Şer a Şehîd Berxwedan Bager, Avzem, Arîn û Şerzanan bûye mizgîniya herî mezin a serketinê. Di Meha Fedaiyan de, bi ruhê hevrê Şehîd Zîlan (Zeynep Kinaci) û serhildêriya Zagrosan, van şehîdên me yên leheng mîna Çaran a di dîroka me de helwesta şoreşgerî bi biryardarî nîşan dan û bûn pirek di navbera kevneşopî û paşerojê de. Nîşan dan ku fedakarî, wêrekî, bawerî û hevrêtî divê li ser bingeha kîjan ruhî be.

Pêvajoya şerê du meh û nîvan a derbasbûyî, bi rengekî eşkere nîşan daye ku Stratejiya Şerê Gel ê Şoreşgerî ku stratejiya azadiyê ya serdemê ye, dema bi rengekî rast bi cih were anîn, hingî tiştek namîne ku gelê me û hêzên me yên azadiyê nikaribin bi ser bixînin. Gerîlayên Azadiyê yên Kurdistanê ku xwe bi ruhê fedaî yê Apoyî û baweriya bi serketinê xurt kirine, eger kêmasiyên şer ên dema derbasbûyî çareser bike, wê serketinên hîn mezintir bi dest bixin. Em zanin ku fermandarî û sewk-îdareyên me şer gav bi gav plan dikin, analîz û perspektîfên pêwîst destnîşan dikin. Eger dersên hatine wergirtin û peyamên ku şehîdên me ji me re hiştine bi rengekî rast bêne şîrovekirin, serketin wê teqez be.

Li ser vê bingehê em careke din di şexsê şehîdên me yên vê pêvajoyê de şehîdên me yên leheng hemûyan bi rêzdarî û minetdarî bi bîr tînin. Em hevrêyên xwe hemûyan ji dil û can pîroz dikin ku tevlî vê pêvajoya serketî bûne. Ji bo wezîfeyên xwe yên vê pêvajoya dîrokî di dema xwe de û bi rengekî serketî bi cih bînin em serketinê ji hevrêyan hemûyan re dixwazin.”