[:ku]
Amadekariyên ciwanên Bakur û Rojhilatê Sûriyê li hember êrişên dewleta Tirk a dagirker dewam dikin. Ciwanan diyar kir ku heta rizgarkirina herêmên dagirkirî ew ê nesekinin û got “Armanc parçekirina hevgirtina gelan û tunekirina xwesteka wan a azadiyê ye, divê ciwan jî li gorî berjewendiyên gelê xwe tev bigerin.”
Ciwanên Bakur û Rojhilatê Sûriyê, bi derketina dijminatî û sûcên dewleta Tirk a dagirker li dijî gelên herêmê êdî sedem û armanca planan nas kirin. Bi destpêkirina Şoreşa 19`ê Tîrmehê re bi hezaran ciwanan cihê xwe di warên leşkerî de girt.
Zêdetir bibîne Ji bo bîranîna Şehîd Bager Erdal
Êrişên leşkerî, planên şerê taybet û gefên dewleta Tirk a dagirker û çeteyên wê li ser gel û herêmê dewam dikin. Ciwan jî ji bo berevaniya welat û parastina destkeftiyan di nava liv û tevgerê de ne.
Di rewşa awarte de ciwanên li herêmê li gorî şerê gel ê şoreşgerî dest bi rêzeçalakiyan kirine; semîner, perwerdeyên destwerdana lezgîn û bikaranîna çekan.
Endama Rêveberiya Desteya Ciwan û Werzîşê ya Herêma Cizîrê Nisrîn Hesen ji ajansa me re got: “Hişyarkirina gel û amadekirina wan erka me ye, ji ber ku ciwan esasê civakê ne.”
Nisrîn Hesen diyar kir ku demeke dirêj e amadekariyan dikin û got: “Di perwerdeya çekan de hin ciwan xwe ji bo mewziyên pêş amade kirine. Beşeke din jî heye ji bo dabînkirina madeyên xwarinê, komkirina dermanan û pêwîstiyên tibî xwe amade dikin.”
15`ê Tîrmehê di civîneke awarte de 120 ciwanan biryara tevlêbûna şerê li hember êrişên dewleta Tirk a dagirker ê li herêmên Bakur û Rojhilatê Sûriyê da.
Nisrîn der barê temamkirina amadekariyan de got: “Em ê heta rizgarkirina herêmên xwe wiha tev bigerin.”
Nisrîn da zanîn ku dewleta Tirk a dagirker bi rêbazên şerê taybet jî êriş dike û got: “Bi nûçeyên derew zextê li psîkolojiya gelê herêmê dike.”
`DIXWAZE XWESTEKA AZADIYÊ YA GELAN TUNE BIKE`
Endama Koordînasyona Yekitiya Jinên Ciwan a Rojava Rîm Dada jî diyar kir ku dewleta Tirk a dagirker bi êrişên xwe yên li ser Bakur û Rojhilatê Sûriyê û Kurdistanê bi giştî; dixwaze ewlehî û aştiyê di herêman de biçewisîne û projeya neteweya demokratîk a ku rêber Abdullah Ocalan pêşkêş kiriye, têk bibe û got: “Di vê pêvajoyê de dixwaze careke din xwe wekî Împaratoriya Osmanî bide nîşandan.”
Rîm diyar kir ku bi armanca parçekirina hevgirtina gelan û tunekirina xwesteka wan a azadiyê, dewleta Tirk planan amade dike.
‘DIVÊ CIWAN GELÊ XWE JI ŞERÊ TAYBET BIPARÊZIN’
Rîm bal kişand ser rêbazên êrişên dewleta Tirk a dagirker û got: “Ne tenê bi yek rêbazê şer dike, bi gelek cureyên şer sûcan pêk tîne; wekî sîxuran û kirîna ciwanan. Erka me ye jî ku em jinên ciwan li ser van xalan hişyar bikin.”
Endamê Tevgera Ciwanên Şoreşger a Sûriyê Elaa Mistefa jî da zanîn ku perwerdeya çek û rêbazên şerê taybet, dihêle ku ew wek ciwan dûrî fikrên ku dijminan li ser wan ferz kiriye, bikevin û bêhtir bibin girêdayî berjewendiyên gelê xwe.
Elaa Mistefa got: “Divê em wek ciwan bi şêwazên cuda li hember êrişên dewleta Tirk a dagirker bisekinin; bi çeka xwe, zanekirina gel, dabînkirina parên xwarin û destwerdana lezgîn.”
Çavkanî: ANHA
[:]
